ವಿಶ್ವದ ದಾರ್ಶನಿಕರ ಹಾಗೂ ಅನುಭಾವಿಗಳ ಪರಂಪರೆಗೆ ಕರ್ನಾಟಕ ನೀಡಿದ ಮಹಾನ್ ಕೊಡುಗೆ ಅಕ್ಕಮಹಾದೇವಿ, ಕರ್ನಾಟಕ ರಾಜ್ಯದ ಶಿವಮೊಗ್ಗ ಜಿಲ್ಲೆಯ ಶಿಕಾರಿಪುರ ತಾಲ್ಲೂಕಿನ ಉಡುತಡಿ ಗ್ರಾಮದಲ್ಲಿ ಜನಿಸಿ, ದೊರೆತ ರಾಜ್ಯ ಸಂಪತ್ತು, ಭೋಗ-ಭಾಗ್ಯ ಮತ್ತು ಲೌಕಿಕ ಬದುಕನ್ನು ನಿರಾಕರಿಸಿ, ತನ್ನಿಷ್ಟದ ದೇವ ಮಲ್ಲಿಕಾರ್ಜುನನನ್ನು ಪತಿಯಾಗಿ ಅರಸಿಕೊಂಡ ಅಕ್ಕಮಹಾದೇವಿಯ ಜೀವನವೇ ಒಂದು ಅದ್ಭುತ ಮಹಾಕಾವ್ಯ.

ಇಂತಹ ಪ್ರಸಿದ್ಧವಾದ ಉಡುತಡಿ ಗ್ರಾಮ ಇಂದು ಐತಿಹಾಸಿಕ ಸ್ಥಳವಾಗಿ, ಪ್ರವಾಸಿ ತಾಣವಾಗಿ, ಪವಿತ್ರ ಕ್ಷೇತ್ರವಾಗಿ ನಾಡಿನ ಮೂಲೆಮೂಲೆಯಿಂದ ಜನರನ್ನು ಆಕರ್ಷಿಸುವಂತೆ ಮಾಡಿದ ಯಶಸ್ಸು ಅಕ್ಕಮಹಾದೇವಿ ಸಮಿತಿಗೆ ಸಲ್ಲುತ್ತದೆ.

ಸಾಮಾನ್ಯ ಗೃಹಿಣಿಯಾದ, ರಾಜಕಾರಿಣಿಯಾದ, ಸಾಹಿತಿಯಾದ, ಸಾಮಾಜಿಕ ಕಾರ್ಯಕರ್ತೆಯಾದ ಹಾಗೂ ಬಹುಮುಖ ಪ್ರತಿಭೆಯುಳ್ಳ ಅಪರೂಪದ ಮಹಿಳೆ ಶ್ರೀಮತಿ ಲೀಲಾದೇವಿ ಆರ್. ಪ್ರಸಾದ್ ಅವರು ಅಕ್ಕಮಹಾದೇವಿ ಸಮಿತಿ ಉಡುತಡಿಯ ಅಧ್ಯಕ್ಷರು. ತುಂಬಾ ಕ್ರಿಯಾಶೀಲವಾಗಿ ಅಕ್ಕನ ಬದುಕು-ಸಾಧನೆಗಳನ್ನು ವರ್ತಮಾನದ ಜಗತ್ತಿಗೆ ಪರಿಚಯಿಸುತ್ತಿರುವ ಈ ಸಮಿತಿಯು ಉಡುತಡಿಯಲ್ಲಿ ದೂರದೃಷ್ಟಿಯುಳ್ಳ ಅನೇಕ ಸಾಮಾಜಿಕ, ಸಾಂಸ್ಕೃತಿಕ, ಸಾಹಿತ್ಯಕ ಕಾರ್ಯಕ್ರಮಗಳನ್ನು ಆಯೋಜಿಸುತ್ತಿದೆ.

ಉಡುತಡಿಯಲ್ಲಿ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ನಡೆಸಲು ಅನುಕೂಲವಾಗುವಂತೆ ಅಕ್ಕನ ಬಯಲು ರಂಗಮಂದಿರವನ್ನು ನಿರ್ಮಿಸಲಾಗಿದೆ. ಇಲ್ಲಿ ಸುಂದರವಾದ ಅಕ್ಕಮಹಾದೇವಿಯ ಕಂಚಿನ ಪ್ರತಿಮೆಯನ್ನು ಪ್ರತಿಷ್ಠಾಪಿಸಲಾಗಿದೆ. ಉಡುತಡಿಯಿಂದ, ಆಂಧ್ರ ಪ್ರದೇಶದಲ್ಲಿರುವ ಕದಳಿಗೆ ನೂರಾರು ಶರಣೆಯರನ್ನು ಸಂಘಟಿಸಿಕೊಂಡು ಪ್ರವಾಸವನ್ನು ಏರ್ಪಡಿಸಿದ ಹೆಗ್ಗಳಿಕೆ ಅಕ್ಕಮಹಾದೇವಿ ಸಮಿತಿಗೆ ಸಲ್ಲುತ್ತದೆ. ಜೊತೆಗೆ ಇನ್ನೂ ಹಲವಾರು ಕಾರ್ಯಚಟುವಟಿಕೆಗಳ ಮೂಲಕ ಉಡುತಡಿಗೆ ಹೊಸ ಸ್ವರೂಪ ಬರುತ್ತಿದೆ. ಇದಕ್ಕೆ ಮುಖ್ಯ ಕಾರಣ ಶ್ರೀಮತಿ ಲೀಲಾದೇವಿ ಆರ್. ಪ್ರಸಾದ್ ಅವರು.

ಅಖಿಲ ಭಾರತ ಶರಣ ಸಾಹಿತ್ಯ ಪರಿಷತ್ತು ಮತ್ತು ರಮಣಶ್ರೀ ಪ್ರತಿಷ್ಠಾನ, ಶ್ರೀಮತಿ ಲೀಲಾದೇವಿ ಆರ್. ಪ್ರಸಾದ್‌ರವರ ನೇತೃತ್ವದಲ್ಲಿ ಅಕ್ಕಮಹಾದೇವಿಯ ಉಡುತಡಿ ಕ್ಷೇತ್ರವನ್ನು ಸಮಗ್ರವಾಗಿ ಬೆಳೆಸಿದ ಹಿನ್ನಲೆಯಲ್ಲಿ ಅಕ್ಕಮಹಾದೇವಿ ಸಮಿತಿಗೆ ೨೦೧೬ರ ‘ರಮಣಶ್ರೀ ಶರಣ ಪ್ರಶಸ್ತಿ’ಯನ್ನು ನೀಡಿ ಗೌರವಿಸಲು ಅಭಿಮಾನ ಪಡುತ್ತದೆ. ಇದು ಅಕ್ಕಮಹಾದೇವಿ ಸಮಿತಿಗೆ ಸಲ್ಲುತ್ತಿರುವ ಪ್ರಶಸ್ತಿಯಾದರೂ, ಅದರ ಹಿಂದಿರುವ ಶ್ರೀಮತಿ ಲೀಲಾದೇವಿ ಆರ್. ಪ್ರಸಾದ್ ಮತ್ತು ಇನ್ನಿತರ ಹಲವಾರು ಕಾರ್ಯಕರ್ತರ ಶ್ರಮ ಮತ್ತು ತ್ಯಾಗಗಳನ್ನೂ ಗೌರವಿಸುತ್ತದೆ.