ಬಾಗಲಕೋಟ ಜಿಲ್ಲೆಯ ಹುನಗುಂದ ತಾಲೂಕಿನ ಧನ್ನೂರಿನಲ್ಲಿ 3-3-1958ರಂದು ಜನನ. ಸುಮಿತ್ರಾದೇವಿ ಹಾಗೂ ಸಿದ್ರಾಮಪ್ಪ ಅಂಗಡಿ ಇವರ ತಾಯಿ ತಂದೆ, ಇಲಕಲ್ಲಿನಲ್ಲಿ ಮತ್ತು ಬಾಗಲಕೋಟೆಯಲ್ಲಿ ಪ್ರಾಥಮಿಕ ಮತ್ತು ಪ್ರೌಢಶಿಕ್ಷಣ, ಕರ್ನಾಟಕ ವಿಶ್ವವಿದ್ಯಾಲಯದ ಎಂ.ಎ. ಪದವಿ, ಗುಲಬರ್ಗಾ ವಿಶ್ವವಿದ್ಯಾಲಯದಿಂದ 1987ರಲ್ಲಿ ಪಿಎಚ್.ಡಿ. ಪದವಿ.

ಗುಲಬರ್ಗಾ ವಿಶ್ವವಿದ್ಯಾಲಯದಲ್ಲಿ ಅಧ್ಯಾಪಕಿಯಾಗಿ, ಪ್ರವಾಚಕರಾಗಿ, ಪ್ರಾಧ್ಯಾಪಕರಾಗಿ ಕನ್ನಡ ಅಧ್ಯಯನ ಸಂಸ್ಥೆಯ ನಿರ್ದೇಶಕರಾಗಿ, ‘ಬಸವಾದಿ ಶರಣ ಸಾಹಿತ್ಯ ಕೇಂದ್ರ’ದ ನಿರ್ದೇಶಕರಾಗಿ ಸೇವೆ ಸಲ್ಲಿಸಿ ನಿವೃತ್ತಿ ಹೊಂದಿದ್ದಾರೆ. ಕರ್ನಾಟಕ ರಾಜ್ಯದ ಉಚ್ಛ ನ್ಯಾಯಾಲಯದ ಆದೇಶದಂತೆ ಜಿಲ್ಲಾ ಕೌಟುಂಬಿಕ ನ್ಯಾಯಾಲಯದಲ್ಲಿ ಸಮಾಲೋಚಕಿಯಾಗಿ ಸೇವೆ ಸಲ್ಲಿಸಿದ್ದಾರೆ.

ಇವರ ಮಾರ್ಗದರ್ಶನದಲ್ಲಿ 15 ವಿದ್ಯಾರ್ಥಿಗಳು ಪಿಎಚ್.ಡಿ. ಪದವಿ ಪಡೆದು ಕೊಂಡಿದ್ದಾರೆ. 20 ವಿದ್ಯಾರ್ಥಿಗಳು ಎಂ.ಫಿಲ್. ಪದವಿ ಪಡೆದುಕೊಂಡಿದ್ದಾರೆ. 8 ವಿದ್ಯಾರ್ಥಿಗಳು ಪಿಎಚ್.ಡಿ. ಅಧ್ಯಯನ ಮಾಡುತ್ತಿದ್ದಾರೆ.

2009-12ರ ಅವದಿಯಲ್ಲಿ ಕರ್ನಾಟಕ ಸರ್ಕಾರದ ಕನ್ನಡ ಭಾಷಾಭಿವೃದ್ಧಿ ಯೋಜನೆ ಯಡಿಯಲ್ಲಿ “ಶರಣ ಸ್ಮಾರಕಗಳ ಕ್ಷೇತ್ರಕಾರ್ಯ” ಸಂಶೋಧನಾ ಕಾರ್ಯ ಪೂರೈಸಿ “12ನೇ ಶತಮಾನದ ಶರಣ ಸ್ಮಾರಕಗಳು, ಭಾಗ-1” ಮತ್ತು 2014-15 ರಲ್ಲಿ ಕರ್ನಾಟಕ ವೀರಶೈವ ವಿದ್ಯಾಭಿವೃದ್ಧಿ ಸಂಸ್ಥೆ, ಬೆಂಗಳೂರು ಇವರ ನೆರವಿನಿಂದ 12ನೇ ಶತಮಾನದ ಶರಣ ಸ್ಮಾರಕಗಳು, ಭಾಗ-2′ ಪ್ರಕಟಗೊಂಡಿವೆ. 10 ವರ್ಷಗಳವರೆಗೆ ಕ್ಷೇತ್ರಕಾರ್ಯ ಮಾಡಿ ಶರಣ ಸ್ಮಾರಕಗಳ ಬಗ್ಗೆ ಸಂಶೋಧನೆ ನಡೆಸಿ ’12ನೇ ಶತಮಾನದ ಶರಣ ಸ್ಮಾರಕಗಳು’ ಎಂಬ ಹೆಸರಿನಡಿ 1700 ಪುಟಗಳ ಮೂರು ಸಂಶೋಧನ ಸಂಪುಟಗಳು ಪ್ರಕಟವಾಗಿವೆ.

ಬೆಡಗಿನ ವಚನಗಳನ್ನು ಕುರಿತು ಪಿಎಚ್‌.ಡಿ ಮಾಡಿದ್ದಾರೆ. 50ಕ್ಕೂ ಮೇಲ್ಪಟ್ಟು ಇವರ ಕೃತಿಗಳು ಪ್ರಕಟವಾಗಿವೆ. ಬೆಡಗಿನ ವಚನಗಳ ಪರಿಭಾಷಾಕೋಶ, ಶರಣ ಜೀವನ, ಫಲದೊಳಗಣ ರುಚಿ, ಶರಣರ ಆರ್ಥಿಕ ಚಿಂತನೆ, ಶರಣರ ಆಯ್ದ ವಚನಗಳ ವ್ಯಾಖ್ಯಾನ ಮಾಲೆಯ 2 ಸಂಪುಟಗಳು, ಲಿಂಗವಂತ- ಈ ಮುಂತಾದ ಕೃತಿಗಳು ಗಮನಾರ್ಹವಾಗಿವೆ. ಕವಿಮಾರ್ಗ ಎನ್ನುವ ತ್ರೈಮಾಸಿಕ ಸಾಹಿತ್ಯಕ ಪತ್ರಿಕೆಯನ್ನು ಕಲಬುರಗಿಯಲ್ಲಿ ಪ್ರಾರಂಭಿಸಿ, ಸಂಪಾದಕ-ಪ್ರಕಾಶಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.

ಇವರ ಮಹತ್ವದ ಕೃತಿಗಳಿಗೆ 15 ಪ್ರಶಸ್ತಿಗಳು, ಒಟ್ಟು ಸಾಧನೆಗೆ 12 ಪ್ರಶಸ್ತಿಗಳು ಹೀಗೆ ಈಗಾಗಲೇ ಅವರಿಗೆ 27 ಪ್ರಶಸ್ತಿಗಳು ದೊರಕಿವೆ. ಆಳಂದ ತಾಲೂಕಾ ಸಾಹಿತ್ಯ ಸಮ್ಮೇಳನ, ತುಮಕೂರು ಜಿಲ್ಲಾ ಕದಳಿ ಮಹಿಳಾ ವೇದಿಕೆ ‘ರಾಜ್ಯ ಮಟ್ಟದ 8ನೇ ಕದಳಿ ಸಮ್ಮೇಳನ’, ಸೊಲ್ಲಾಪುರದಲ್ಲಿ ‘ಹಳಕಟ್ಟಿ ವಚನೋತ್ಸವ’ ಹಾಗೂ ‘ಡಾ. ಜಯದೇವಿತಾಯಿ ಲಿಗಾಡೆ ಜನ್ಮ ಶತಮಾನೋತ್ಸವ ಸಮ್ಮೇಳನ’ಗಳ ಸರ್ವಾಧ್ಯಕ್ಷತೆಯ ಗೌರವ ಹೊಂದಿದ್ದಾರೆ.

ಶರಣ ಸಾಹಿತ್ಯ ಕ್ಷೇತ್ರಕ್ಕೆ ಇವರು ನೀಡಿದ ಅನುಪಮವಾದ ಕೊಡುಗೆಯನ್ನು ಪರಿಗಣಿಸಿ, ಅಖಿಲ ಭಾರತ ಶರಣ ಸಾಹಿತ್ಯ ಪರಿಷತ್ತು ಮತ್ತು ರಮಣಶ್ರೀ ಪ್ರತಿಷ್ಠಾನಗಳು ಅತ್ಯಂತ ಸಂತೋಷದಿಂದ, 2019ನೆಯ ಸಾಲಿನ “ರಮಣಶ್ರೀ ಶರಣ ಪ್ರಶಸ್ತಿ”ಯನ್ನು ನೀಡಿ ಗೌರವಿಸುತ್ತಿವೆ.