1955ರ ಜುಲೈ 20 ರಂದು ಧಾರವಾಡ ಜಿಲ್ಲೆಯ ಕುಂದಗೋಳದಲ್ಲಿ ಜನಿಸಿದ ಬಸವರಾಜ ಸಾದರ ಅವರು ಮೂಲತಃ ಹುಲ್ಲಂಬಿಯವರು, ಮಾಧ್ಯಮಿಕ ಶಾಲಾ ಹಂತದಲ್ಲೇ ಶರಣರ ಹಾಗೂ ವಚನ ಸಾಹಿತ್ಯದ ಬಗ್ಗೆ ಅಭಿರುಚಿ ಮೂಡಿಸಿಕೊಂಡಿರುವ ಅವರು, ತಮ್ಮ ಓದಿನ ಉದ್ದಕ್ಕೂ ಆ ಕುರಿತ ವೈಚಾರಿಕ ಮತ್ತು ಸಂಶೋಧನಾತ್ಮಕ ಅಧ್ಯಯನ ಮಾಡುತ್ತ ಬಂದಿದ್ದಾರೆ. ಎಂ.ಎ. ನಂತರ ‘ಡಿಪ್ಲೋಮಾ – ಇನ್ – ಬಸವ ಸ್ಟಡೀಜ್’ ಕೋರ್ಸನ್ನು ಬ್ಯಾಂಕ್ ಮತ್ತು ಚಿನ್ನದ ಪದಕದೊಂದಿಗೆ ಪೂರೈಸಿ, ವಚನ ಸಾಹಿತ್ಯದ ಮಹತ್ತು ಬೃಹತ್ತುಗಳನ್ನು ಕುರಿತು ಗಂಭೀರವಾದ ಬರವಣಿಗೆಗೆ ತೊಡಗಿದ ಡಾ. ಸಾದರ ಅವರು, ಶರಣಕ್ರಾಂತಿಯ ಐತಿಹಾಸಿಕ ಮಹತ್ವ ಮತ್ತು ವಚನ ಸಾಹಿತ್ಯದ ಜಾಗತಿಕ ಮೌಲ್ಯಗಳನ್ನು ಕುರಿತು ಆಗಿನಿಂದಲೇ ವೈವಿಧ್ಯಪೂರ್ಣ ಲೇಖನಗಳನ್ನು ಬರೆಯುತ್ತ ಬಂದಿದ್ದಾರೆ. ಆಕಾಶವಾಣಿಯಲ್ಲಿ ವೃತ್ತಿ ಕೈಗೊಂಡ ನಂತರ ಅಲ್ಲಿಯೂ ಶರಣಾಂದೋಲನ ಮತ್ತು ವಚನಗಳ ವೈಚಾರಿಕತೆ ಕುರಿತು ಅನೇಕ ಕಾರ್ಯಕ್ರಮಗಳನ್ನು ಆಯೋಜಿಸಿ ಪ್ರಸಾರ ಮಾಡಿದ್ದಾರೆ. ವಚನಗಳ ವಾಚನ, ವಿಶ್ಲೇಷಣೆ ಮತ್ತು ಹಾಡುಗಳನ್ನೊಳಗೊಂಡ ‘ವಚನ ವೈಭವ’ದಂಥ ವಿನೂತನ ಕಾರ್ಯಕ್ರಮಗಳನ್ನು ನಿರ್ಮಿಸಿ ಲಕ್ಷಾಂತರ ಕೇಳುಗರಿಗೆ ತಲುಪಿಸಿದ್ದೂ ಅವರ ಮಹತ್ಸಾಧನೆ. ವಚನಗಳ ಸಮಗ್ರ ಮತ್ತು ವೈಚಾರಿಕ ಅಧ್ಯಯನದ ಫಲವಾಗಿ ಅವರಿಂದ ರಚನೆಗೊಂಡ ಗ್ರಂಥಗಳಲ್ಲಿ, ‘ಹೊಸ ಆಲೋಚನೆ’, ‘ತಮಂಧಕ್ಕೆ ಬೆಳಗು’, ‘ಕಾಯಕ-ದಾಸೋಹ’, ‘ಮೀರುವ ಘನ, ವರ್ತಮಾನಕ್ಕೂ ವಚನ’ ‘ವಚನ ವರ್ಷ’, ‘ಶರಣ ಕ್ರಾಂತಿ – ವಿಭಿನ್ನ ಪ್ರತಿಕ್ರಿಯೆಗಳು’, ‘ನೋಯುವ ಹಲ್ಲಿಗೆ ಹೊರಳುವ ನಾಲಿಗೆ’, ‘ವಚನ ವರ್ಷಾರ್ಥ’ – ಇವು ಕೆಲವು ಗಮರ್ನಾಹವಾಗಿವೆ.

‘ವಚನ ವರ್ಷಾರ್ಥ’ ಗ್ರಂಥವು 143 ಶರಣರ 365 ವಚನಗಳ ಮೂಲ ಪಠ್ಯ ಮತ್ತು ಅವುಗಳ ವಿಶ್ಲೇಷಣೆಯೊಂದಿಗೆ ಪ್ರಕಟವಾಗಿದ್ದು ಅದರ ಆರು ಸಾವಿರ ಪ್ರತಿಗಳು ಈಗಾಗಲೇ ಜನತೆಗೆ ತಲುಪಿವೆ. ಆಧುನಿಕ ವಚನಗಳ ಮಾದರಿಯಲ್ಲಿ ಡಾ. ಸಾದರ ಅವರು ರಚಿಸಿದ ತೊಟ್ಟು, ತಟಕುಗಳು ಅತ್ಯಂತ ಜನಪ್ರಿಯವಾಗಿವೆ. ಇವುಗಳು ಕೂಡ ವಚನಗಳು ಮಾಡುವ ಪರಿಣಾಮದಂತೆ ಜನಮಾನಸದ ಮೇಲೆ ಅಷ್ಟೇ ಪರಿಣಾಮ ಬೀರುತ್ತಿವೆ.

ನಿವೃತ್ತಿಯ ನಂತರ ಕರೋನಾ ಪಿಡುಗಿನ ಸಂದರ್ಭದಲ್ಲಿ ಅವರು ತಮ್ಮ ಮಗಳು ಕವಿತಾಳ ನೆರವಿನೊಂದಿಗೆ ನಿರ್ಮಿಸಿದ ಯೂಟ್ಯೂಬ್‌ ಮೂಲಕ ಜಗಜ್ಜಾಲದಲ್ಲಿ ಪ್ರಸಾರ ಮಾಡಿದ ‘ವಚನಯಾನ’ ಐವತ್ತು ಕಂತುಗಳ ಶ್ರವ್ಯ – ದೃಶ್ಯ ಸರಣಿ ಕನ್ನಡದಲ್ಲಿ ಮೊಟ್ಟಮೊದಲನೆಯದು. ಅನಂತರ ‘ಪ್ರಜಾವಾಣಿ’ ಪಾಡಕಾಸ್ಟ್ ಮೂಲಕ ನಿರ್ಮಿಸಿ ಪ್ರಸಾರ ಮಾಡಿದ ‘ವಚನವಾಣಿ’ ಸರಣಿಯಂತೂ ಆರು ಲಕ್ಷಕ್ಕೂ ಹೆಚ್ಚು ಕೇಳುಗರಿಗೆ ತಲುಪಿ ಒಂದು ಹೊಸ ಇತಿಹಾಸವನ್ನೇ ನಿರ್ಮಿಸಿತು. . ತಮ್ಮ ನಿವೃತ್ತಿ ಜೀವನದ ಬಹುಭಾಗವನ್ನು ಶರಣರ ಹಾಗೂ ವಚನಗಳ ಅಧ್ಯಯನಕ್ಕೆ ಮೀಸಲಿಟ್ಟಿರುವ ಡಾ. ಬಸವರಾಜ ಸಾದರ ಅವರ ಈ ನಿರಂತರ ಸಾಧನೆಗೆ ಪ್ರೊ. ಸ.ಸ. ಮಾಳವಾಡ ಪ್ರಶಸ್ತಿ, ಕಾವ್ಯಾನಂದ ಪ್ರಶಸ್ತಿ, ಜರಗನಹಳ್ಳಿ ಬಸವ ಪ್ರಶಸ್ತಿ, ಜ್ಞಾನದಾಸೋಹಿ ಪ್ರಶಸ್ತಿ ಮೊದಲಾದ ಅನೇಕ ಉನ್ನತ ಗೌರವಗಳು ಸಂದಿವೆ.

ಶರಣರ ಬದುಕು ಮತ್ತು ವಚನ ಸಾಹಿತ್ಯದ ಆಳವಾದ ಅಧ್ಯಯನದಲ್ಲಿ ತಮ್ಮನ್ನು ನಿರಂತರವಾಗಿ ತೊಡಗಿಸಿಕೊಂಡದ್ದಷ್ಟೇ ಅಲ್ಲದೆ, ವಚನಕಾರರು ಜಗತ್ತಿಗೆ ಸಾರಿದ ಮೌಲ್ಯಗಳ ಅಡಿಯಲ್ಲಿಯೇ ತಮ್ಮ ಬದುಕನ್ನು ರೂಪಿಸಿಕೊಂಡಿರುವ ಡಾ. ಬಸವರಾಜ ಸಾದರ ಅವರ ಸಾಧನೆಯನ್ನು ಗಮನಿಸಿ, ಅಖಿಲ ಭಾರತ ಶರಣ ಸಾಹಿತ್ಯ ಪರಿಷತ್ತಿನ ಮೂಲಕ ರಮಣಶ್ರೀ ಪ್ರತಿಷ್ಠಾನವು ಕೊಡಮಾಡುವ 2023ರ ಸಾಲಿನ ‘ರಮಣಶ್ರೀ ಶರಣ ಹಿರಿಯ ಶ್ರೇಣಿ ಪ್ರಶಸ್ತಿ’ಯನ್ನು ನೀಡಿ ಸನ್ಮಾನಿಸಲು ಹೆಮ್ಮೆ ಪಡುತ್ತವೆ.